شات وصورة

يكون الامر هكذا حين يتبادل عراقييّن حوارا ما هذه الايام:احدهما روحه طالعة و فاض بيه والثاني يهوّنها عليه.وهذا لا يمنع من ان يتبادلا الادوار في مرة قادمة .
هذا حوار بين عراقيتين من قومية مختلفة و طائفة مختلفة:كردية سنية و عربية شيعية بس اصحاب من عشر سنين.
هلو شلونج-
انتي وين اشو ماكو؟ لازم آني اسأل-
انا هنا يا حبي ..اليوم كنتي مداومة ؟ و يوم الاربعاء راح تكونين موجودة ؟-
اليوم لا. بس الاربعاء اي انشاالله-
لعد اخابرج ان شالله... بلكي نتشاوف .انا قربت انسى شكلج-
ان شالله ، تعرفين ؟ اني مشتاقة جدا-
(....) قسمنا صاير كئيب فد مرة يا -
شكو ما كو شنو اخر الاخبار عندكم؟-
رئيس قسمنا قدم على تقاعد وأخذ اجازة شهر و رئيس معهد ال(....) قدم على تقاعد و دكتور (ن) قدم على اجازة لمدة سنة و دكتورة (ن) خلت زوجها يسافر للاردن يدوّر على شغل هناك
هو منو رئيس القسم حاليا ؟-
في مستشفى (...)فلان الفلاني و في مستشفى (......) الدكتورة فلان-
هو شنو السبب بالضبط ليش هالهروب و القتل ؟-
الاطباء اللي انقتلوا ماكو سبب محدد،و لا تهديد و لا سرقة-
حبي ديري بالج على نفسج-
شنو ممكن اسوي يعني ؟ صاير القتل مجاني ، و لا كأن اللي قدامهم بشر-
شوفي ادعي من رب العالمين الستر و الحفظ والله الحافظ-
الله يسمع منك يارب ...اتمنى لو اهلي يطلعون حتى لو ناخذ غرفتين بعمّان ولا هالخوف .. ما تتصورين لما اروح للقسم واشوف جماعتي المرعوبين انعدي منهم واخاف آني همين
شوفي بما انه اني مريت بهاى التجربة اكولج شي واحد: لكل اجل كتاب .واينما تكونو يدرككم الموت. الله يستر. ترة الغربة قاتلة و الواحد يتمنى لو يموت ببيتهم. الله يستر
تعرفين ..اليوم الظهر كنت افكر ...يعني الفلسطينين اخذوا منهم ارضهم لكن احنا يريدون نموت كلنا ،و لايريدون الارض ولا النفط يريدون العراق يفرغ من الاطباء ....حرب ابادة
ان شا الله تفرج من حيث لاتدرون ...ما احد يعرف شنو القصة ... لا تفكرين هيجي-
و الله فكرت لو احنا كنا كلاب على هذه الكرة الارضية كان صارت النا قيمة اكثر.الناس تموت كل يوم وتدفن قتلاها و تنتحب بدون ما يتحرك اي صوت ،يعطونا كهرباء ساعتين باليوم واحنا ساكتين و نروح نداوم ونشتغل .... الازبال مالية الشوارع.... و لا احد يتحرك .كأن كل هذا وضع طبيعي يليق بينا
احنة من زمان هيجي بس بعد ما نتحمل هسة بعد ما نتحمل....الوضعية مأساوية و المشكلة محد يحجي و ما كو حل-
انتو ناوين تبقون هنا ؟-
حبي خلي ايمانج بالله كبير و ارفعي معنوياتج ترة الكل تعبانة ... اني راح اروح انشالله نتشاوف قريبا-
ان شاء الله-
آني محتارة اكبر حيرة بعدين احجيلج....باي-
- - - - - - - - - - - - - - - - - - - - - - - - - - - - - - - -
postsecret.com حاولت ان اتجاهل هذه الصورة التي في موقع
و ان اقنع نفسي ان اللي كتبها معتوه او شيء من هذا القبيل ، لكن ما قدرت .استفزتني كثيرا

.

.