........

يقولون ان العراقيين اللي برة بعيدين عنا وعن مشاكلنا.
يقولوا انهم ما ذاقوا اللي ذقناه و ما شافوا اللي شفناه.
لكن كل يوم اكتشف ان العراقيين اللي برة عايشين جوة العراق اكثر منا .
وجدت هذه المدونة و قريت سيرة صاحبتها.شعرت كأني اعرفها من اول كم كلمة .هذه السيدة من البصرة .غادرت البصرة في 1987نفس السنة اللي كل احنا تركنا البصرة فيها لانها صارت مدينة مهجورة و منطقة حرب . شعرت اننا سمعنا كل القذائف معا و فكرت يمكن نكون درسنا في نفس الثانوية بس بينا سنوات قليلة.لا اعرف شعرت اننا متشابهين .
ثم جاءت لبغداد (كما فعل معظم النازحين ايامها )...ثم الحصار ....كتبت انها قالت لاهلها اذا صار الراتب ما يجيب ثمن حذاء فسأغادر البلد.نفس الجملة اللي كلنا كنا نفكر فيها : سعر الحذاء اكثر من الراتب ! ما اعرف ليش هذا كان مقياس القدرة الشرائية لمعظم الموظفين.
اليوم اللي اكتشفت فيه هذا البلوج كنت قد فتحت موقع البي بي سي أشوف شنو كتبوا عن محاكمة صدام و شفت خبر ثاني حطمني : نسفوا تمثال ابو جعفر المنصور.بعدها شفت بلوجها وكان فيه نفس الموضوع .التمثال وهوة محطم،القاعدة المزخرفة المحفورة صايرة قطع قطع قطع و الرأس كله دخان اسود ، (قاعدة التمثال هذه كان فيها باب من خشب ،شكله تراثي و دائما كنت أسأل روحي لما نفوت : شنو أكو جوة التمثال ورا هذا الباب ؟) ......البنت قالت اللي في قلبي.....بس أنا جبانة وخايفة وسكتت .
في يومها لم اكمل القراءة بس البارحة رجعت و قريت و شفتها حاطة صور لايام السلام في البصرة.السفرات في ابو الخصيب في شط العرب.أهل البصرة يحبوا الطلعات والغناء و المرح .عند اهلي صور مشابهة كثيرة ، لكن منو يقعد يدورها و يشوفها هالايام ؟
فيروز بلوجك ذبحني .