عراقنا .. سُرّاقُنا

في العيد ،لاحظ الناس ان رسائل الموبايل تصل للشخص الواحد كذا مرة،نفس الرسالة ونفس المرسل فد ثلاث او اربع مرات .و لما تسأل الشخص يقول لك انا كلما ابعثها يقولوا لي انها لم ترسل و اعيد ارسالها الى ان انتبهوا ان الرصيد يقل في كل مرة و يقطع اجرة المسج ،يعني الرسالة الواحدة بكلفة اربع رسائل والدنيا عيد وكل واحد يرسل لقائمة من اصحابه و اقاربه...و شوف الحساب شلون يجمع.

الخلل (السرقة ) منين ؟ من الشركة الاصلية او من وكلائها هنا ؟
يعني ما كافي ان اللي في بغداد لا يستطيع الاتصال بالشمال و لا بالجنوب و كل شركة من الشركات الثلاثة اللي مستلمة عقود الموبايل محتكرة منطقة و قافلة عليها يعني يسرقونا فوقها ليش ؟و في وضح النهار و الناس كلها تشكي مع العلم ان شركة اوراسكوم(عراقنا) اللي مستلمة المنطقة الوسطى كلفتها اعلى:( الارقام بالدولار و السنت لانها مع التحويل الى الدينار العراقي تطلع اكبر و توجع اكثر) ، المسج من آسيا سيل في الشمال ب 2 سنت وفي شركة أثير MTC) ) ب5 سنت، بينما في بغداد المسج ب8 سنت .
و بما ان معظم اصحابنا برة البلد فتطلع ب 12 سنت لانها دولية .وعندما يقولون لم ترسل الرسالة يعني يقطعوا 12 سنت على الخالي بلاش و بما اني ارسل رسائل طويلة شوية فكل مرة ينقص رصيدي 24 سنت و آخر مرة قل الرصيد 48 سنت على رسالة ما تزال في موبايلي ...
اما الجديد ، المبهر، المنعش فهو انهم البارحة كتبوا لي تم ارسال الرسالة و هي حسب ما عرفت اليوم الصبح ما وصلت اصلا..و انا قاعدة منتظرة الرد عليها ...

طيب الموظف البسيط شنو يسوي يعني ؟
و بعدين هما العراقيين ناقصين هم اضافي ؟ ما كافي الصرف على مولدات الكهرباء و طوابير البنزين اللي تخلي الواحد يشتري بنزين من السوق السودا .

الكارتات الجديدة نزلت عليها صورة كاظم الساهر والناس هنا تقول انه صار احد المساهمين في الشركة ،طيب يرضيك يا كاظم ؟ اذا كنت تدري باللي يصير فتلك مصيبة وان كنت لا تدري فالمصيبة أعظم

- - - - - -

تحديث: وصلنا الى دولارين و(الرسالة )مش عم تمشي...خلاص بطّلنا